1905 сыллаахха кулуба Семен Александровичка Алексей Елисеевич Кулаковскай – Өксөкүлээх Өлөксөй кэлэ сылдьыбыт. Ол кэмҥэ Сэмэн олорор сиригэр Аһыкайга үс сэргэни туруорбут. Өксөкүлээх ол сэргэлэргэ кэлэ сылдьыбыт сылын, кириэһин бэйэтэ оҥорон биэрбит. Ол сэргэлэртэн биирэ билигин турар, иккитэ охтубуттар.
Таарыйа Өксөкүлээҕи этэр буоллахха, “Кэччэгэй баай” хоһоонун Кэнтик баайыгар сылдьан, хонон баран кэлэйбитин суругар холбообут буолуон сөп. Ол Кэнтик баайа Хапсыкы дэнэрэ. Киниэхэ хоммутугар үс кырбас эти буһарбыт. Ортотугар биир кырбас аһыытыҥы амтаннаах хара эт баара үһү. Өксөкүлээх туох этин сураспыта, күһүн дьааттаах оту сиэн өлбүт ынах этэ буолан биэрбит. Оннук тугу да хаалларбат эбит диэн сөхпүт. Ол баай Өксөкүлээххэ үрүҥ көмүс манньыатын суоттаппыт. Кыһыл көмүс манньыатын мантан Аанньаахха диэри биирдии ат хардыытыгар ууран тиэрдиэм этэ диэбит. “Отой утуйбат, түүн үс чааска туран сылгыларын аһатан кэлэр, дьоҥҥо хамнас төлөөмөөрү. Акаары киһи эбит”, – диэн Өксөкүлээх кэпсиир эбит.
Кривогорницын кулубаҕа Өксөкүлээх иккитэ кэлэн барбыт. Кини үчүгэйдик билсэн – көрсөн баран кулубаҕа: ”Маннык үчүгэй ходуһалаах, сирдээх – уоттаах киһи от охсор массыыната аҕалтар”, – диэн сүбэлээбит уонна бэйэтэ сакаастаһан от охсор массыына аҕалан биэрбит. Ол массыынаны икки оҕус тардар, биир киһи олорор, икки киһи оҕустары сиэтэр. Ону бытаан, ити кэннэ биир үчүгэй охсооччу охсорун кыайан охсубат эбит диэн кулуба сирбит. Массыынатын арыыта бүтэн хаалбытыгар ынах арыытын уулларан кута сатаабыттар. Кэлин бырахпыттарын кыҥаттара Ньурбаҕа илдьэ барбыттара.
Бу ахтыытын көрдөххө, А.Е. Кулаковскай саҥаны-кэрэни мэлдьи көрдүү, тарҕата, сүбэлии сылдьар эбит. Бэйэтинэн соҕуруу дойду от охсор массыынатын туһанныннар диэн дьоҥҥо аҕалан биэрэрэ да сыра – сылба буолуохтаах.
Аһыкай Сайылыгар 2015с. Алтынньы 3 күнүгэр сэргэлэри сөргүтэн туруоруу тэрээһинэ буолбута. Эмэҕирэн охтубут икки сэргэни кээмэйдээн уонна үтүгүннэрэн удьуор уус Анатолий Саввич Таркаев оҥорбут.
Өксөкүлээх Өлөксөй сиэнэ Людмила Реасовна Кулаковская эһэтин сэргэтин таһыгар алтан төбөлөөх, харысхал бэлиэлээх, “2015” диэн суруктаах бэйэтин сэргэтин туруорбута. Сэргэлэри туруоруу сиэрин—туомун алгысчыт Николай Павлович Корякин—Уран Ньукулай толорбута. Сэргэлэр турбуттара 110 сылыгар аналлаах суруктаах мэҥэ таас ууруллубута.
Ыйытыы: Үөһээ Бүлүү Оҥхой нэһилиэгэр Өксөкүлээх Өлөксөй ханнык алааска сэргэ туруорбутай?
